طبعا كلنا بنحب المعجنات وبنحب نأكل حاجة سريعة وعشان كدا هنتكلم النهاردة عن الباتيه اطعم من الجاهز

يلا بينا ??

طريقة عمل الباتيه???

المقادير
٢ بيض، معلقة خميرة فورية او خميرة بيرة، اربع معالق كبار لبن بودر، كوب لبن دافي او مياه دافية، معلقة كبيرة خل، اربع معالق كبار سكر ونص معلقة صغيرة ملح، معلقتين زبدة بحرارة الغرفة، نص كوب زبدة سايحة، كيلو دقيق وممكن زيادة حسب العجينة
نضيف كوب اللبن او المياه الدافي ومعاه السكر ونقلب وبعدين اتنين بيضة كاملة وبياض البيضة التانية والصفار نشيله للدهان وجه العجينة وبعدين نضيف اللبن البودر والخميرة ونقلب كويس وبعدين ننزل بالدقيق والملح ونعجن كويس جدا يعني نحط كل المكونات ماعدا الزبدة ونعجن كويس جدا لحد ماتبقى العجينة تكون بتلزق شوية ونسبة الدقيق حسب العجينة هاتاخد اد ايه المهم تبقى بتلزق بعد ماتتعجن كويس وبعدين ننزل بمعلقتين الزبدة نلم بيهم العجينة ونسبها تخمر وبعدين نعجن تاني وبعدين نسبها تخمر تاني وبعدين نعجن كويس ونبتدي نحضر نص كوب زبدة سايحة ونقسم العجينة مثلا على أربع كور كبار وناخد واحدة نفردها بس الاول نرش دقيق على الرخامة ونفرد عليها العجينة لأنها هاتكون بتلزق ونرش من فوقها ونفرد كويس ويكون سمكها رفيع مش سميك ويبقى على شكل مستطيل كانك هاتعمل سينابون وبعدين تجيبي سكينة وتقسميها بالطول يبقى مستطيل كذا واحد وسمكها رفيع وندهن علي العجينة بالفرشة زبدة دهان بسيط من فوق على كل قطعة وتبتدي تلفي كل واحدة رول ولو حابة تبقى محشية احشيها جبن او اي حاجة حباها وترصي في الصينية وتسبيها ترتاح حوالي ساعة بس مش عايزاها تخمر وتعلي خالص لا ترتاح وتعلي حاجة بسيطة خالص يعني يعتبر ترتاح وماتختمرش وتعلي عشان هي هاتعلي في الفرن زي الصورة وبعدين نعمل باقي العجين بنفس الطريقة ونسيبه يرتاح ونسخن الفرن على درجة حرارة ٢٥٠ او ٢٠٠ ويسخن كويس جدا وبعدين قبل ما ندخله الفرن ندهوه بصفار البيضة ومعاها معلقتين لبن وفانيلا وندخل الفرن على الرف من فوق ويكون الفرن سخن جدا وهانلاقي بعد حوالي ١٠ دقايق ارتفع واحمر من تحت نروح بقى مشغلين الشواية وياخد لون وبعد كده نطلعه ونكون مجهزين بخاخة مياه ونرش عليه بعد طلوعه من الفرن هو سخن على طول رشة على الوش وبعدين نغطيه بفوطة لحد مايبرد ويبقى جاهز للأكل والف هنا ياحلوين ?